Ankesat e familjarëve të pacientëve me Covid 19 te Infektivi, reagon Presidenti Meta


Pas shqetësimit të një grupi familjarësh të pacientëve me Covid-19, të cilët ankoheshin se nuk kishin marrë informacione prej 36 orësh tek Spitali Infektiv, reagon Presidenti Ilir Meta.

Sipas kreut të shtetit, “Familjarët e qytetarëve të prekur nga COVID-19 meritojnë të trajtohen denjësisht dhe të informohen me transparencë të plotë për shëndetin e të dashurve të tyre, të cilëve ju uroj shërim sa më të shpejtë”.

Sipas Metës, “Pamjet shqetësuese të publikuara sot në media për grumbullime të shumta në ambientet e jashtme të Spitalit Infektiv në Tiranë kërkojnë reflektim të menjëhershëm”.

Sot u publikuan disa foto të grumbullimit të familjarëve, ndërsa kishte dalë për t’i sqaruar mjeku i njohur Pëllumb Pipero. Familjarët pretendonin se kishin 36 orë pa marrë informacione mbi shëndetin e të afërmve të tyre.